نحنا كتوانسة معروفين شعب خبزيست وفي رمضان علاقتنا تزيد مع الخبز والي كان يشري باقات في النهار يولي في رمضان يشد الصف سوايع على خبيزة امبسس والا خبز سبيسيال.
والخبز ماهوش جديد علينا وعنا برشا أنواع: فمة خبز كل يوم و فمة الي نعملوه في المناسبات و من اقدم أنواع الخبز التونسي هو خبز الطابونة الي و حسب المؤرخين والحفريات يرجع للقرن 6 قبل الميلاد. معناتها الطابونة من قبل الفترة البونيقية. و في لهجتنا قبل ما انقولوش "إنشعل الطابونة" وإلا "إنحمي الطابونة" الكلمة القديمة كانت "يحمش الطابونة" و من غادي خرجت كلمة " حمّش فلان على علان " معناتها شعل فلان على علان.
من الخبز الموجود برشا في تونس خبز الطاجين وإلا يتسمى زادة خبز الغناي وكل مدينة في تونس تعمل أنواع من الخبز هذا خاصين بيها إلي يختلفو في اشكالهم وحتى باش معمولين ونوعية السميد.
كان نحكيو على قرقنة فمة خبز خاص بهالجزيرة إسموا خبز القاليط الي يتميز بكونو يطيب حتى يولي يابس. واصل حكايتو يرجع للبحارة إلي كي يخرجو في البحر يعديو ايامات على البابور والخبز هذا كان حل ليهم انهم يهزوه معاهم. ومدامنا في قرقنة مانجموش مانحكيوش على خبز الفيتورة والي يتعمل بالفيتورة متاع الزيتون ونلقاوه زادة في المدن الي فيها الزيتون.
و كي نعملوا تنقيزة للقروان نلقاو خبز الشواي الي مايصح كسكروت كفتاجي اصلي كان بيه. وكان تعرفو خبز الشواي الصفاقسي راهو ماهوش نفس الخبز وهو أصلا في صفاقس فيه زوز أنواع شواي الطبق و شواي القاع .
مانيش باش انزيد انكثر عليكم بانواع الخبز اما لازم نحكيو على نوع موجود في تونس الكل هاك الخبز الرقيق و الرهيف الي نلقاوه في تونس الكل : الملاوي الي موجود منو زادة في المغرب و اسمو المسمن.
و كيما برشا حاجات أخرى الخبز زادة كان فيه أنواع, خبز متاع الناس المبسوطين و خبز للقلالة ويناديولو الحلوزي و في بلايص اخرين الخبز القربودي الي كان يتعمل إما بإلي قعد من قشور القمح بعد التغربيل متاعو و الا الخبز المقلي الي ماعندو حتى منفعة غذائية.
هاذم شوية من أنواع الخبز التونسي الي في تاريخو سنين و سنين, مازال كيما المطبقة الي في توزر اسمها محجوبة و خبز القرص و المجمع الي يتعمل في العيد و يكون في وسطو عظمة.
